Partitë opozitare në Shqipëri në disa qytete dhe akse rrugore të vendit kanë organizuar protesta të “mosbindjes civile”, duke kundërshtuar tarifat për kalimin e automjeteve në “Rrugën e Kombit” dhe sipas tyre për largimin e qytetarëve nga skema e ndihmës ekonomike.
Nën organizimin e Partisë Demokratike të Shqipërisë (PD) dhe Partisë Lëvizja Socialiste për Integrim (LSI), qytetarët kanë bllokuar qarkullimin e automjeteve në akset rrugore në Vorë të Qarkut të Tiranës, në Bradashesh të Elbasanit, në Milot, dhe në Çermë të Lushnjes.
Në protesta ka patur dhe tensione, pasi drejtuesit e automjeteve dhe forcat e policisë kanë kundërshtuar bllokimin e akseve rrugore.
Për protestat që vazhdojnë me bllokimin e disa akseve rrugore kombëtare, ka reaguar edhe Drejtoria e Përgjithshme e Policisë së Shqipërisë, ku thekson se policia nuk ka marrë njoftim ligjor për protestat.
Protestës në Vorë i është bashkuar edhe lideri i opozitës dhe njëkohësisht kryetari i Partisë Demokratike të Shqipërisë, Lulzim Basha.
